Beiträge

S’ Schnäggelied

Refrain:

D' Schnägge-Fasnacht isch e Hit,
jede rächte Schnägg macht mit,
und 3 Daag lang darf jetz alles luschtig syy.
D' Schnägge-Fasnacht isch e Hit,
jede rächte Schnägg macht mit,
drumm zieh s' Goschtym a, denn bisch Du au derby!

**********

Dr Babbe hoggt im Sässel-Lift,
hett d' Latte an de Fiess.
D' Mamme schrybbt e Karte,
us Grindelwald viel Griess.
D' Kinder stägge dief im Schnee,
s' Schlittle isch ne z' viel.
Sy wäre doch jetz gar so gäm
dehei in Oberwil.

Refrain

Dr Megge schwingt e Pinsel,
dr Karli rollt druffloos.
S' wird ghämmeret und gnaglet,
dä Waage wird famos.
Dr Seppi isch der Värslischmied,
sufft Wysse bis är kibbt.
Und wenn är denn ein intuss hett,
was meinsch was dä denn schrybbt.

Refrain

Hoggsch vorem Kaffi fertig,
duss isch's bitterkalt.
De draimsch vo Meer und Palme,
der Summer kunnt hoffsch bald.
Do plötzlig ghörsch e Pfyffe und
Drummle uff der Stroos:
De gschbürsch e Grybble in der Bruscht:
dr Umzug dä goht loos.

Refrain

E Schissdräggzygli kunnt grad zerscht,
derno e Gugge-Muusig.
E Waage mit 10 Waggis druff,
sy dien wie d' Sau s' isch gruusig.
Der Gmeini Preesi stoot am Rand,
schdreggt d' Händ us wie e Kind.
E Waggis schüttet ihm e Sagg
voll Räppli uff e Grind.

Refrain

Kuum isch dr Umzug denn verby,
gseesch d' Schnitzelbänggler reifle.
Vo Baiz zu Baiz so gseesch se
ihri Helge ummeschleife.
D' Värsli, die sinn pfäfferet, s' wird usem volle gschöpft.
Und wenn dr Bangg denn gsunge isch,
wird grad e Wysse köpft.

Refrain